ਅੰਮ੍ਰਿਤਸਰ ਵਿੱਚ 16 ਫਰਵਰੀ ਨੂੰ ਸ਼ੁਰੂ ਕੀਤੀ ਜਾਵੇਗੀ ਜੈਵਿਕ ਉਤਪਾਦਾਂ ਦੀ ਮੰਡੀ : ਡਿਪਟੀ ਕਮਿਸ਼ਨਰ

• ਕੰਪਨੀ ਬਾਗ ਵਿੱਚ ਸਵੇਰੇ 8 ਵਜੇ ਤੋਂ 11 ਵਜੇ ਤੱਕ ਹਰ ਐਤਵਾਰ ਲਗੇਗੀ ਮੰਡੀ

ਅੰਮ੍ਰਿਤਸਰ 4 ਫਰਵਰੀ 2025 : ਪੰਜਾਬ ਵਿੱਚ ਜੈਵਿਕ ਖੇਤੀ ਨੂੰ ਉਤਸ਼ਾਹਿਤ ਕਰਨ ਲਈ ਮੁੱਖ ਮੰਤਰੀ ਸ੍ਰੀ ਭਗਵੰਤ ਮਾਨ ਵੱਲੋਂ ਜਾਰੀ ਹਦਾਇਤਾਂ ਅਨੁਸਾਰ ਡਿਪਟੀ ਕਮਿਸ਼ਨਰ ਸ੍ਰੀਮਤੀ ਸ਼ਾਕਸ਼ੀ ਸਾਹਨੀ ਨੇ ਅੰਮ੍ਰਿਤਸਰ ਵਿੱਚ 16 ਫਰਵਰੀ ਤੋਂ ਜੈਵਿਕ ਉਤਪਾਦਾਂ ਦੀ ਮੰਡੀ ਸ਼ੁਰੂ ਕਰਨ ਦਾ ਫੈਸਲਾ ਲਿਆ ਹੈ। ਅੱਜ ਇਸ ਸਬੰਧੀ ਕੀਤੀ ਮੀਟਿੰਗ ਜਿਸ ਵਿੱਚ ਖੇਤਰੀ ਪ੍ਰਬੰਧਕ, ਪੰਜਾਬ ਐਗਰੋ, ਮੁੱਖ ਖੇਤੀਬਾੜੀ ਅਫਸਰ ਕਿਸਾਨ ਭਲਾਈ ਵਿਭਾਗ, ਡਿਪਟੀ ਡਾਇਰੈਕਟਰ ਬਾਗਬਾਨੀ, ਐਸ.ਸੀ.ਮਿਊਸੀਪਲ ਕਾਰਪੋਰੇਸ਼ਨ, ਐਸ.ਡੀ.ਓ ਪ੍ਰਦੂਸ਼ਨ ਕੰਟਰੋਲ ਬੋਰਡ ਅਤੇ ਏ.ਡੀ.ਓ ਮੰਡੀਕਰਣ ਮੌਜੂਦ ਸਨ, ਨਾਲ ਗੱਲਬਾਤ ਕਰਦੇ ਉਨਾਂ ਕਿਹਾ ਕਿ ਹਫਤਾਵਾਰੀ ਜੈਵਿਕ ਮੰਡੀ ਦਾ ਉਦਘਾਟਨ ਮਿਤੀ 16.02.2025 ਨੂੰ ਸਵੇਰੇ 10 ਵਜੇ ਕੰਪਨੀ ਬਾਗ ਅੰਮ੍ਰਿਤਸਰ ਗੇਟ ਨੰਬਰ 1 ਦੇ ਅੰਦਰ ਕੀਤਾ ਜਾਵੇਗਾ। ਜਿਸ ਵਿੱਚ ਪੰਜਾਬ ਐਗਰੋ ਵੱਲੋਂ ਆਰਗੈਨਿਕ ਸਰਟੀਫਾਈਡ ਕਿਸਾਨ ਆਪਣੀ ਉੱਪਜ ਦਾ ਮੰਡੀਕਰਣ ਖੁਦ ਆਪ ਕਰਨਗੇ। ਦੱਸਣਯੋਗ ਹੈ ਕਿ ਪੰਜਾਬ ਐਗਰੋ ਜੋ ਕਿ ਪੰਜਾਬ ਸਰਕਾਰ ਦਾ ਇਕ ਅਦਾਰਾ ਹੈ ਜੋ ਕਿ ਪੰਜਾਬ ਵਿੱਚ ਆਰਗੈਨਿਕ ਸਰਟੀਫਿਕੇਸ਼ਨ ਦੀ ਨੋਡਲ ਏਜੰਸੀ ਹੈ। ਇਹ ਸਾਲ 2015-16 ਤੋਂ ਪੂਰੇ ਪੰਜਾਬ ਵਿੱਚ ਜੈਵਿਕ ਖੇਤੀ ਕਰ ਰਹੇ ਕਿਸਾਨਾ ਦੀ ਪਛਾਣ ਕਰਦਾ ਹੈ ਅਤੇ ਉਹਨਾਂ ਦੀ ਆਰਗੈਨਿਕ ਰਜਿਸਟਰੇਸ਼ਨ ਕਰਦਾ ਹੈ।  ਕਿਸਾਨ ਜੋ ਕਿ ਜੈਵਿਕ ਖੇਤੀ ਕਰਨ ਦੇ ਇਛੁੱਕ ਹਨ, ਨੂੰ ਰਜਿਸਟਰ ਕਰਕੇ ਆਰਗੈਨਿਕ ਖੇਤੀ ਕਰਨ ਸੰਬੰਧੀ ਟਰੇਨਿੰਗ ਵੀ ਦਿੱਤੀ ਜਾਂਦੀ ਹੈ ਅਤੇ ਇਸ ਨਾਲ ਸੰਬੰਧਤ ਉਤਪਾਦ ਵੀ ਮੁਹੱਇਆ ਕਰਵਾਏ ਜਾਂਦੇ ਹਨ। ਡਿਪਟੀ ਕਮਿਸ਼ਨਰ ਨੇ ਦੱਸਿਆ ਕਿ ਇਸ ਮੰਡੀ ਵਿੱਚ ਲੋਕਾਂ ਦੀ ਸਿਹਤ ਲਈ ਵਰਦਾਨ ਪਦਾਰਥ ਜਿਵੇਂ ਕਿ ਜੈਵਿਕ ਗੁੜ, ਸ਼ਕਰ, ਹਲਦੀ, ਸਬਜ਼ੀਆਂ, ਦਾਲਾਂ ਅਤੇ ਆਟਾ ਆਦਿ ਖਰੀਦ ਕਰਨ ਲਈ ਉਪਲੱਬਧ ਕਰਾਈਆ ਜਾਣਗੀਆਂ। ਇਸ ਮੰਡੀ ਵਿੱਚ ਪੰਜਾਬ ਐਗਰੋ ਵੱਲੋਂ ਸਰਟੀਫਾਈਡ ਕਿਸਾਨ ਹੀ ਭਾਗ ਲੈ ਸਕਣਗੇ। ਮੰਡੀ ਦਾ ਸਮਾਂ ਹਰ ਐਤਵਾਰ ਸਵੇਰੇ 8 ਵਜੇ ਤੋਂ ਸਵੇਰੇ 11 ਵਜੇ ਤੱਕ ਦਾ ਹੋਵੇਗਾ। ਇਹ ਮੰਡੀ ਹਰ ਐਤਵਾਰ ਕੰਪਨੀ ਬਾਗ ਗੇਟ ਨੰਬਰ 1 ਅੰਮ੍ਰਿਤਸਰ ਵਿਖੇ ਲਗਾਈ ਜਾਵੇਗੀ। ਜੈਵਿਕ ਮੰਡੀ ਦੇ ਉਦਘਾਟਨ ਦੇ ਮੁੱਖ ਮਹਿਮਾਨ ਮਾਨਯੋਗ ਕੈਬਨਿਟ ਮੰਤਰੀ ਸ੍ਰੀ ਕੁਲਦੀਪ ਸਿੰਘ ਧਾਲੀਵਾਲ ਅਤੇ ਪੰਜਾਬ ਐਗਰੀ ਐਕਸਪੋਰਟ ਦੇ ਚੇਅਰਮੈਨ ਸ੍ਰੀ ਮੰਗਲ ਸਿੰਘ ਹੋਣਗੇ। ਇਸ ਮੀਟਿੰਗ ਵਿੱਚ ਡੀ.ਸੀ. ਸਹਿਬਾਨ ਨੇ ਵੱਖ-ਵੱਖ ਸੰਬੰਧਤ ਵਿਭਾਗਾਂ ਨੂੰ ਇਸ ਮੰਡੀ ਨੂੰ ਸਫਲਤਾ ਪੂਰਵਕ ਚਲਾਉਣ ਲਈ ਦਿਸ਼ਾ ਨਿਰਦੇਸ਼ ਜਾਰੀ ਕੀਤੇ ਗਏ।