- ਨੂਰੀ ਜਾਮਾ ਮਸਜਿਦ ਦਾਖਾ ਵਿਖੇ ਕਰਵਾਇਆ ਜਲਸਾ, ਸ਼ਹਿਰ ਅੰਦਰ ਕੱਢਿਆ ਜਲੂਸ
ਮੁੱਲਾਂਪੁਰ ਦਾਖਾ, 28 ਸਤੰਬਰ (ਸਤਵਿੰਦਰ ਸਿੰਘ ਗਿੱਲ) ਮੁਸਲਿਮ ਭਾਈਚਾਰੇ ਦੇ ਲੋਕਾਂ ਵਲੋਂ ਆਪਣੇ ਨਬੀ ਪੈਗੰਬਰ ਮੁਹੰਮਦ ਸਾਹਿਬ ਦਾ ਜਨਮ ਦਿਨ ਸੁੰਨੀ ਨੂਰੀ ਜਾਮਾ ਮਸਜਿਦ ਮੁੱਲਾਂਪੁਰ ਦਾਖਾ ਵਿਖੇ ਬੜੇ ਹੀ ਹਰਸ਼ੋ-ਹਲਾਸ਼ ਨਾਲ ਮਨਾਇਆ ਗਿਆ ਤੇ ਸ਼ਹਿਰ ਅੰਦਰ ਢੋਲ-ਢਮੱਕਿਆ ਨਾਲ ਜਲੂਸ ਕੱਢਿਆ ਤੇ ਮਸਜਿਦ ਵਿਖੇ ਵੱਡਾ ਜਲਸਾ ਕੀਤਾ ਗਿਆ, ਜਿਸ ਵਿੱਚ ਇਲਾਕੇ ਭਰ ਦੇ ਲੋਕਾਂ ਨੇ ਸਮੂਲੀਅਤ ਕਰਕੇ ਵੱਡਾ ਇਕੱਠ ਕੀਤਾ। ਆਵਾਮ ਨੂੰ ਪੈਗੰਬਰ ਮੁਹੰਮਦ ਦਾ ਪੈਗਾਮ ਦੇਣ ਲਈ ਬਿਹਾਰ ਦੇ ਪੂਰਨੀਆਂ ਸ਼ਹਿਰ ਤੋਂ ਵਿਸ਼ੇਸ਼ ਤੌਰ ’ਤੇ ਮੌਲਵੀ ਤੇ ਮੁਸਲਿਮ ਭਾਈਚਾਰੇ ਦੇ ਪ੍ਰਚਾਰਕ ਮੁਫਤੀ ਸ਼ਹਰੇਯਾਦ ਸ਼ਿਰਕਤ ਕੀਤੀ। ਇਸ ਮੌਕੇ ਮੁਫਤੀ ਸ਼ਹਰੇਯਾਦ ਨੇ ਆਪਣੇ ਭਾਸ਼ਨ ਵਿੱਚ ਕਿਹਾ ਕਿ ਪੈਗੰਬਰ ਮੁਹੰਮਦ ਸਾਹਿਬ ਜੀ ਖਲਕਤ ਨੂੰ ਇਨਸਾਨੀਅਤ ਦਾ ਪਾਠ ਪੜ੍ਹਾਉਣ ਲਈ ਆਏ ਸਨ। ਪੈਗੰਬਰ ਦੇ ਹੁਕਮ ਅਨੁਸਾਰ ਉਹ ਸੱਚਾ ਮੁਸਲਮਾਨ ਹੈ ਜੋ ਜਰਦਾ, ਖੈਨੀ, ਗੁਟਕਾ, ਕੂਲਅੱਪ, ਪਰਾਇਆ ਹੱਕ ਨਾ ਖਾਵੇ ਤੇ ਨਾ ਹੀ ਉਹ ਝੂਠ, ਫਰੇਬ, ਕੁਫਰ ਤੋਲੇ। ਅੱਲਾ ਤਾਲਾ ਨੇ ਆਪਾ ਸਭ ਨੂੰ ਇਨਸਾਨੀਅਤ ਦਾ ਪਾਠ ਪੜ੍ਹਾਇਆ ਹੈ। ਬਿਨ੍ਹਾ ਕਿਸੇ ਡਰ, ਭੈਅ ਦੇ ਦੋ ਵਕਤ ਦੀ ਨਿਮਾਜ਼ ਅਦਾ ਕਰਦੇ ਰਹੋਂ। ਜੋ ਇਨਸਾਨ ਕਿਸੇ ਦੇ ਧਰਮ ਵਿੱਚ ਰੁਕਾਵਟ ਪੈਦਾ ਕਰਦਾ ਹੈ, ਉਸ ਦਾ ਵਿਨਾਸ਼ ਇੱਕ ਦਿਨ ਜਰੂਰ ਹੁੰਦਾ ਹੈ, ਉਹ ਪੱਕੇ ਹਿੰਦੁਸਤਾਨੀ ਹਨ ਇਸ ਦੀ ਸਰ-ਜਮੀਂ ਤੇ ਉਹ ਪੈਦਾ ਹੋਏ ਤੇ ਇਸ ਵਿੱਚ ਵੀ ਦਫਨ ਹੋਣਗੇ। ਫਿਰ ਉਨ੍ਹਾਂ (ਮੁਸਲਿਮ ਭਾਈਚਾਰੇ) ਤੋਂ ਕੌਣ ਦੇਸ਼ ਲਈ ਵਫਾਦਾਰ ਹੋਇਆ। ਜੋ ਕਹਿ ਰਹੇ ਨੇ ਹਿੰਦੁਸਤਾਨ ਸਾਡਾ ਹੈ। ਉਹ ਤਾਂ ਆਪਣੇ ਪੀਰ ਪੈਗੰਬਰਾਂ ਵੱਲੋਂ ਦਿੱਤੇ ਸਿਧਾਂਤ ’ਤੇ ਪਹਿਰਾ ਦੇ ਰਹੇ ਹਨ। ਇਸ ਮੌਕੇ ਭਾਈਚਾਰੇ ਦੇ ਲੋਕਾਂ ਨੂੰ ਵਧਾਈ ਦਿੰਦਿਆਂ ਸੁੰਨੀ ਨੂਰੀ ਜਾਮਾਂ ਮਸਜਿਦ ਮੁੱਲਾਂਪੁਰ ਦਾਖਾ ਦੇ ਮੌਲਵੀ ਇਮਾਮ ਮੁਹੰਮਦ ਮੋਤੀਉਰ ਰਹਿਮਾਨ ਨੇ ਕਿਹਾ ਕਿ ਲੋੜਵੰਦਾ ਦੀ ਸਹਾਇਤਾ ਹੀ ਮੁਹੰਮਦ ਸਾਹਿਬ ਦਾ ਸੁਨੇਹਾ ਰਿਹਾ, ਉਨ੍ਹਾਂ ਨੇ ਸੰਸਾਰ ਤਿਆਗੀ ਪੀਰਾਂ, ਫਕੀਰਾਂ ਅਤੇ ਰੱਬ ਦੀ ਇਬਾਦਤ ਕਰਨ ਵਾਲੇ ਲੋਕਾਂ ਨੂੰ ਆਪਾ ਸਮਰਪਿਤ ਕੀਤਾ। ਉਨ੍ਹਾਂ ਨੇ ਕਿਹਾ ਕਿ ਇਸਲਾਮ ਧਰਮ ਦੇ ਆਖਰੀ ਪੈਗ਼ੰਬਰ ਮੁਹੰਮਦ ਸਾਹਿਬ ਨੇ ਲੋੜਵੰਦਾਂ ਦੀ ਸੇਵਾ ਦੇ ਨਾਲ ਇਸਲਾਮ ਧਰਮ ਦੇ ਪ੍ਰਚਾਰ-ਪਸਾਰ ਅਤੇ ਬੰਦਗੀ ਨੂੰ ਪਹਿਲ ਦਿੱਤੀ। ਪੈਗੰਬਰ ਦੇ ਜਨਮ ਦਿਨ ਮੌਕੇ ਸ਼ਹਿਰ ਅੰਦਰ ਕੱਢੇ ਜਲੂਸ ਤੇ ਕਰਵਾਏ ਜਲਸੇ ਨੂੰ ਲੈ ਕੇ ਮੁਸਲਿਮ ਭਾਈਚਾਰੇ ਦੇ ਲੋਕਾਂ ਦੇ ਚਿਹਰਿਆਂ ’ਤੇ ਵੱਖਰਾ ਹੀ ਜਲੌਅ ਦੇਖਣ ਵਾਲਾ ਸੀ। ਬੜੀ ਹੀ ਉਤਸ਼ਾਹ ਨਾਲ ਉਹ ਉੱਚੀ ਉੱਚੀ ਨਾਅਰੇ ਲਗਾ ਰਹੇ ਸਨ। ਇਸ ਮੌਕੇ ਮੁਹੰਮਦ ਖੇਰੂ, ਮੁਹੰਮਦ ਯਾਕਿਰ, ਮੁਹੰਮਦ ਅਬੀਦ, ਮੁਹੰਮਦ ਹਫ਼ੀਫ, ਮੁਹੰਮਦ ਯਾਸੀਨ, ਇਸਮਾਇਲ, ਮੁਹੰਮਦ ਕੇਸਰ, ਮੁਹੰਮਦ ਅਲੀ, ਮੁਹੰਮਦ ਇਸਲਾਮ, ਮੁਹੰਮਦ ਹਸਮੁਖ ਸਮੇਤ ਹੋਰਨਾਂ ਵੱਡਾ ਸਹਿਯੋਗ ਦਿੰਦਿਆਂ ਆਪਣੇ ਪੈਗੰਬਰ ਨੂੰ ਸਿਜਦਾ ਕੀਤਾ।
