ਪਟਨਾ, 19 ਅਕਤੂਬਰ, 2024 : ਸ਼ਰਾਬ ਨੇ ਇੱਕ ਵਾਰ ਫਿਰ ਤੋਂ ਲੋਕਾਂ ਦੇ ਘਰਾਂ 'ਚ ਸੱਥਰ ਵਿਛਾ ਦਿੱਤੇ ਹਨ। 16 ਪਿੰਡਾਂ ਦੇ ਲੋਕ ਨੇ ਆਪਣਿਆਂ ਨੂੰ ਗੁਆ ਦਿੱਤਾ ਹੈ। ਹਰ ਪਾਸੇ ਲੋਕਾਂ ਦੀਆਂ ਚੀਕਾਂ ਹੀ ਸੁਣਾਈ ਦੇ ਰਹੀਆਂ ਹਨ।ਬਿਹਾਰ ਵਿੱਚ ਸ਼ਰਾਬ ਕਾਰਨ ਮੌਤਾਂ ਦਾ ਸਿਲਸਿਲਾ ਰੁਕਣ ਦਾ ਨਾਂ ਨਹੀਂ ਲੈ ਰਿਹਾ ਹੈ। ਬਿਹਾਰ ਵਿੱਚ ਮੌਤਾਂ ਦੀ ਕੁੱਲ ਗਿਣਤੀ 65 ਤੱਕ ਪਹੁੰਚ ਗਈ ਹੈ, ਜਿਨ੍ਹਾਂ ਵਿੱਚੋਂ ਸੀਵਾਨ ਵਿੱਚ 48, ਸਾਰਨ ਵਿੱਚ 15 ਅਤੇ ਗੋਪਾਲਗੰਜ ਵਿੱਚ 2 ਮੌਤਾਂ ਹੋਈਆਂ ਹਨ। ਹਾਲਾਂਕਿ ਪ੍ਰਸ਼ਾਸਨਿਕ ਪੁਸ਼ਟੀ 37 ਹੈ, ਜਿਨ੍ਹਾਂ ਵਿੱਚੋਂ 28 ਸੀਵਾਨ ਵਿੱਚ, 7 ਸਾਰਨ ਵਿੱਚ ਅਤੇ 2 ਗੋਪਾਲਗੰਜ ਵਿੱਚ ਮਾਰੇ ਗਏ ਹਨ। ਇਸ ਦਾ ਕਹਿਰ ਛਪਰਾ ਅਤੇ ਸੀਵਾਨ ਜ਼ਿਿਲ੍ਹਆਂ ਦੇ 16 ਪਿੰਡਾਂ ਵਿੱਚ ਦੇਖਣ ਨੂੰ ਮਿਲ ਰਿਹਾ ਹੈ। ਇੱਥੇ 50 ਬਿਮਾਰ ਲੋਕ ਹਨ ਜਿਨ੍ਹਾਂ ਦਾ ਸਦਰ ਹਸਪਤਾਲ, ਬਾਸਮਪਤਪੁਰ ਸੀਐਚਸੀ ਅਤੇ ਪੀਐਮਸੀਐਚ ਪਟਨਾ ਵਿੱਚ ਇਲਾਜ ਚੱਲ ਰਿਹਾ ਹੈ। ਸਾਰਨ ਵਿੱਚ 15 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ ਪਰ ਅਧਿਕਾਰਤ ਪੁਸ਼ਟੀ 7 ਹੈ। ਛਪਰਾ ਦੇ ਡੀਐਮ ਅਮਨ ਸਮੀਰ ਅਤੇ ਐਸਪੀ ਡਾਕਟਰ ਆਸ਼ੀਸ਼ ਕੁਮਾਰ ਨੇ ਦੱਸਿਆ ਕਿ ਸੱਤ ਲੋਕਾਂ ਦੇ ਮਰਨ ਦੀ ਸੂਚਨਾ ਹੈ। ਛਪਰਾ ਪੁਲਿਸ ਦੀ ਆੈਸ਼ਆਈਟੀ ਟੀਮ ਨੇ ਇੱਕ ਸ਼ਰਾਬ ਕਾਰੋਬਾਰੀ ਨੂੰ ਗ੍ਰਿਫਤਾਰ ਕੀਤਾ ਹੈ। ਉਹ ਭਗਵਾਨਪੁਰ ਹਾਟ ਥਾਣਾ ਖੇਤਰ ਦੇ ਪਿੰਡ ਬਿਲਾਸਪੁਰ ਦਾ ਰਹਿਣ ਵਾਲਾ ਹੈ। ਮੁਲਜ਼ਮ ਰਜਨੀਕਾਂਤ ਜ਼ਹਿਰੀਲੀ ਸ਼ਰਾਬ ਦੀ ਸਪਲਾਈ ਚੇਨ 'ਚ ਕੜੀ ਦਾ ਕੰਮ ਕਰਦਾ ਸੀ। ਐਸਆਈਟੀ ਨੇ ਸੀਵਾਨ ਵਿੱਚ ਵੀ 10 ਲੋਕਾਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। "ਸ਼ਰਾਬ ਸਪਲਾਈ ਕਰਨ ਦੇ ਇਲਜ਼ਾਮ ਵਿੱਚ ਰਜਨੀਕਾਂਤ ਨਾਮ ਦੇ ਇੱਕ ਵਿਅਕਤੀ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ। ਇਸ ਪੂਰੇ ਸਕੈਂਡਲ ਵਿੱਚ ਇੱਕ ਛੋਟੀ ਜਿਹੀ ਕੜੀ ਹੈ। ਐਸਆਈਟੀ ਟੀਮ ਲਗਾਤਾਰ ਛਾਪੇਮਾਰੀ ਕਰ ਰਹੀ ਹੈ। ਪੁਲਿਸ ਛੋਟੇ ਤੋਂ ਲੈ ਕੇ ਵੱਡੇ ਤੱਕ ਸਾਰੇ ਮਾਫੀਆ ਉੱਤੇ ਧਿਆਨ ਦੇ ਰਹੀ ਹੈ। ਜੋ ਵੀ ਦੋਸ਼ੀ ਹੈ,ਉਸ 'ਤੇ ਕਾਰਵਾਈ ਕੀਤੀ ਜਾਵੇਗੀ।" -ਡਾ. ਕੁਮਾਰ ਅਸ਼ੀਸ਼, ਐਸ.ਪੀ, ਸਰਾਂ ਸੀਵਾਨ ਅਤੇ ਛਪਰਾ ਤੋਂ ਇਲਾਵਾ ਗੋਪਾਲਗੰਜ 'ਚ ਕੁੱਲ 2 ਲੋਕਾਂ ਦੀ ਮੌਤ ਹੋ ਚੱੁਕੀ ਹੈ। ਇੱਕ ਦਾ ਇਲਾਜ ਚੱਲ ਰਿਹਾ ਹੈ। ਗੋਪਾਲਗੰਜ ਦੇ ਮੁਹੰਮਦਪੁਰ ਦੇ ਰਹਿਣ ਵਾਲੇ ਲਾਲ ਬਾਲੂ ਰਾਏ ਅਤੇ ਬੈਕੁੰਥਪੁਰ ਦੇ ਬੰਧੌਲੀ ਪਿੰਡ ਦੇ ਲਾਲਦੇਵ ਮਾਂਝੀ ਦੀ ਮੌਤ ਹੋ ਗਈ ਹੈ। ਲਾਲਦੇਵ ਮਾਂਝੀ ਦਾ ਪੁੱਤਰ ਪ੍ਰਦੀਪ ਕੁਮਾਰ ਹਸਪਤਾਲ ਵਿੱਚ ਦਾਖ਼ਲ ਹੈ। ਦੱਸਿਆ ਜਾਂਦਾ ਹੈ ਕਿ ਲਾਲਦੇਵ ਮਾਂਝੀ ਪਿਤਾ-ਪੁੱਤਰ ਮੱਝਾਂ ਖਰੀਦਣ ਲਈ ਮਸ਼ਰਖ ਗਏ ਸਨ ਅਤੇ ਉਥੇ ਸ਼ਰਾਬ ਪੀਤੀ। ਦੱਸ ਦੇਈਏ ਕਿ ਬਿਹਾਰ 'ਚ ਸ਼ਰਾਬ 'ਤੇ ਪਾਬੰਦੀ ਨੂੰ 8 ਸਾਲ ਹੋ ਗਏ ਹਨ ਪਰ ਹੁਣ ਤੱਕ ਇਸ ਨੂੰ ਪੂਰੀ ਤਰ੍ਹਾਂ ਲਾਗੂ ਨਹੀਂ ਕੀਤਾ ਗਿਆ। ਸੂਬੇ ਦੇ ਜ਼ਿਿਲ੍ਹਆਂ ਵਿੱਚ ਖੁੱਲ੍ਹੇਆਮ ਸ਼ਰਾਬ ਵਿਕ ਰਹੀ ਹੈ। ਲੋਕ ਪੀ ਕੇ ਮਰ ਰਹੇ ਹਨ। ਜੇਕਰ 2016 ਤੋਂ 2024 ਤੱਕ ਦੇ ਸਮੇਂ ਦੀ ਗੱਲ ਕਰੀਏ ਤਾਂ ਇਸ ਸਮੇਂ ਦੌਰਾਨ 500 ਤੋਂ ਵੱਧ ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ ਪਰ ਸਰਕਾਰ ਇਸ ਸਬੰਧੀ ਕੋਈ ਸਖ਼ਤ ਕਦਮ ਨਹੀਂ ਚੁੱਕ ਸਕੀ। ਜਿਸ ਕਾਰਨ ਮੁੜ ਤੋਂ ਬਿਹਾਰ ਵਿੱਚ ਜ਼ਹਿਰੀਲੀ ਸ਼ਰਾਬ ਨਾਲ ਮੌਤਾਂ ਹੋ ਰਹੀਆਂ ਹਨ। ਬਿਹਾਰ ਵਿੱਚ 1 ਅਪ੍ਰੈਲ 2016 ਤੋਂ ਸ਼ਰਾਬ ਦੀ ਵਿਕਰੀ ਲਾਗੂ ਹੋ ਗਈ ਸੀ। 5 ਅਪ੍ਰੈਲ 2016 ਤੋਂ ਹਰ ਕਿਸਮ ਦੀ ਸ਼ਰਾਬ 'ਤੇ ਪਾਬੰਦੀ ਲਗਾ ਦਿੱਤੀ ਗਈ ਸੀ। ਇਸ ਕਾਨੂੰਨ ਤਹਿਤ ਨਾ ਕੋਈ ਵੀ ਵਿਅਕਤੀ ਸ਼ਰਾਬ ਪੀ ਸਕਦਾ ਹੈ ਅਤੇ ਨਾ ਹੀ ਵੇਚ ਸਕਦਾ ਹੈ ਪਰ ਬਿਹਾਰ 'ਚ ਪੂਰਨ ਪਾਬੰਦੀ ਤੋਂ ਬਾਅਦ ਹਰ ਰੋਜ਼ ਸ਼ਰਾਬ ਪੀਣ ਵਾਲੇ ਅਤੇ ਵਪਾਰੀ ਫੜੇ ਜਾ ਰਹੇ ਹਨ। ਹਰ ਰੋਜ਼ ਸ਼ਰਾਬ ਦੀਆਂ ਵੱਡੀਆਂ ਖੇਪਾਂ ਬਰਾਮਦ ਹੋ ਰਹੀਆਂ ਹਨ। ਬਿਹਾਰ ਵਿੱਚ ਦੇਸੀ ਸ਼ਰਾਬ ਸ਼ਰੇਆਮ ਬਣਦੀ ਹੈ। ਬਿਹਾਰ ਵਿੱਚ 2016 ਵਿੱਚ ਮੁਕੰਮਲ ਪਾਬੰਦੀ ਲਾਗੂ ਕੀਤੀ ਗਈ ਸੀ। ਉਦੋਂ ਤੋਂ ਹੀ ਜ਼ਹਿਰੀਲੀ ਸ਼ਰਾਬ ਪੀਣ ਨਾਲ ਮੌਤਾਂ ਦਾ ਸਿਲਸਿਲਾ ਜਾਰੀ ਹੈ। ਜੇਕਰ ਅਸੀਂ ਸਰਕਾਰੀ ਅੰਕੜਿਆਂ 'ਤੇ ਨਜ਼ਰ ਮਾਰੀਏ ਤਾਂ 2016 ਵਿੱਚ 156, 2018 ਵਿੱਚ 9, 2021 ਵਿੱਚ 90, 2022 ਵਿੱਚ 100 ਤੋਂ ਵੱਧ, 2023 ਵਿੱਚ 35 ਅਤੇ 2024 ਵਿੱਚ ਹੁਣ ਤੱਕ 28 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ।
