ਲੁਧਿਆਣਾ, 20 ਫਰਵਰੀ : ਅੰਤਰਰਾਸ਼ਟਰੀ ਮਾਤ ਭਾਸ਼ਾ ਦਿਵਸ 2023 ਦੀ ਪੂਰਵ ਸੰਧਿਆ 'ਤੇ, ਪੰਜਾਬ ਦੇ ਮੁੱਖ ਮੰਤਰੀ, ਸ਼ ਭਗਵੰਤ ਸਿੰਘ ਮਾਨ ਨੇ ਲੁਧਿਆਣਾ ਵਿਖੇ ਵਿਸ਼ੇਸ਼ ਤੌਰ 'ਤੇ ਤਿਆਰ ਕੀਤੀ ਘੜੀ ਜਾਰੀ ਕੀਤੀ, ਜਿਸ ਨੂੰ ਪੁਲਿਸ ਕਮਿਸ਼ਨਰ ਸ਼੍ਰੀ ਮਨਦੀਪ ਸਿੰਘ ਸਿੱਧੂ ਆਈ.ਪੀ.ਐਸ. ਵਲੋਂ ਭੇਂਟ ਕੀਤਾ ਗਿਆ ।ਇਸ ਘੜੀ ਵਿੱਚ ਗੁਰਮੁਖੀ ਲਿਪੀ ਵਿੱਚ ਪੰਜਾਬੀ ਵਰਣਮਾਲਾ ਦੇ 35 ਅੱਖਰ ਉੱਕਰੀ ਹੋਏ ਹਨ ਅਤੇ ਹੇਠਾਂ " ਮਾ ਬੋਲੀ ਸਾਡਾ ਮਾਣ " ਸਲੋਗਨ ਹੈ। ਸੀਪੀ ਨੇ ਦੱਸਿਆ ਕਿ ਇਹ ਘੜੀ ਸਾਡੀ ਮਾਂ ਬੋਲੀ *ਪੰਜਾਬੀ* ਨਾਲ ਜੁੜੇ ਰਹਿਣ ਦੀ 24*7 ਯਾਦ ਦਿਵਾਉਣ ਵਾਲੀ ਹੋਵੇਗੀ। 21 ਫਰਵਰੀ, 2023 ਦੇ ਦਿਨ ਨੂੰ ਉਜਾਗਰ ਕਰਨ ਲਈ, ਕਮਿਸ਼ਨਰੇਟ ਦੀ ਪੁਲਿਸ ਲਾਈਨ ਵਿੱਚ ਇੱਕ ਵਿਸ਼ੇਸ਼ ਪ੍ਰੋਗਰਾਮ ਆਯੋਜਿਤ ਕੀਤਾ ਜਾ ਰਿਹਾ ਹੈ ਜਿੱਥੇ ਸਾਰੇ ਜੀ.ਓਜ਼ ਅਤੇ ਐਸ.ਐਚ.ਓਜ਼ ਨੂੰ ਜਾਰੀ ਕੀਤੀ ਗਈ ਘੜੀ ਦੀ ਪ੍ਰਤੀਰੂਪ ਪੇਸ਼ ਕੀਤੀ ਜਾਵੇਗੀ ਤਾਂ ਜੋ ਇਹਨਾਂ ਨੂੰ ਉਹਨਾਂ ਦੇ ਸਬੰਧਤ ਦਫਤਰਾਂ ਵਿੱਚ ਲਗਾਇਆ ਜਾ ਸਕੇ। ਜ਼ਿਕਰਯੋਗ ਹੈ ਕਿ ਪੂਰੀ ਲੁਧਿਆਣਾ ਪੁਲਿਸ ਟੀਮ ਨੂੰ ਪੰਜਾਬੀ ਭਾਸ਼ਾ ਵਿੱਚ ਆਪਣੇ ਨਾਮ ਦੇ ਬੈਜ ਲਗਾਉਣ ਦੇ ਨਿਰਦੇਸ਼ ਦਿੱਤੇ ਗਏ ਹਨ।ਸਾਰੇ ਦਫ਼ਤਰਾਂ ਵਿੱਚ ਪੰਜਾਬੀ ਭਾਸ਼ਾ ਦੀ ਵਰਤੋਂ ਨੂੰ ਯਕੀਨੀ ਬਣਾਉਣ ਲਈ ਸੀਪੀ ਲੁਧਿਆਣਾ ਨੇ ਸਾਰੇ ਪੁਲਿਸ ਦਫ਼ਤਰਾਂ ਅਤੇ ਇਮਾਰਤਾਂ ਦੇ ਦਫ਼ਤਰੀ ਬੋਰਡ ਵੀ ਪੰਜਾਬੀ ਭਾਸ਼ਾ ਵਿੱਚ ਹੋਣ ਦੇ ਹੁਕਮ ਦਿੱਤੇ ਹਨ।
